Гоман дацангийн Хансүр мориллоо

Өмнөд Энэтхэгийн Балданбрайбун Гоман дацангийн хансүр, гэвш лхаарамба Лувсанжалцан дээдэс 2025.10.15-ны өдөр манай төвд морилон саатаж "Очироор огтлогч"-ийн эш хайрлаж утгыг тайлан айлдаж номын авшиг түгээв.

Хансүр Лувсанжалцан дээдэс нь Гоман дацанд эрдэм мэдлэгээрээ цолгорон тэргүүлж ангийн данбын лхаарамба болсон бөгөөд мэргэд гарахын орон Гомангийн хамба ламын өндөр хэргэмийг 6 жил амжилттай хашиж буддын олон олон эрдэмтэдийг төрүүлэн гаргажээ. Эдүгээ Гандан ширээтийн ажлын албаны дарга ажээ.

Дээдэс тэрбээр Очир огтлогчийн гүн утгыг хэн бүхэнд ойлгомжтой айлдахын сац ажил амьдралаа ном мөрд урвуулах аргыг энгүүн сайхнаар айлдаж Маналын тарнийн эш хүртээв.

Манай төвийн Бодь мөрийн зэргийн хамт олон санаачилж "Их хөлгөн судруудыг" үсэгчилэн уншихыг зорьсон билээ. Ийнхүү Гоман хансүр дээдэс бээр Очир огтлогч судрын эш хүртээж Их хөлгөн судруудын уншлагын эх үндэс тавигдаж буй нь бэлгэшээлтэй юм.

Удахгүй Очир огтлогч судрыг үсэгчилэн уншиж эхэлнэ.